Stel: ie koopt een boek

Stél, want het huuft niet, ie kunt best zunder, het is gien stoet.

Dus stél daj een boek koopt. Betaolen. Hen huus. Gao maor zitten. Nou hej een boek. Wat veur boek is het?

Is het een goed boek? Kom d'r maor ies achter. Bin ie al begunnen te lezen? Fout!

Kiek eerst maor ies wat er op de kaft stiet. Is het een foto van een dooie kip of een schaoldier? Breng maor weerum hen Iwema. Zukse boeken bint niks weerd.

Is het een foto van een soldaot of van een brandende Duutse tank? Zukse boeken bint prima. Tenmiensten op het eerste gezicht.

Stiet d'r heulemaol gien foto op en ok gien petret van Wilhelmina of zuks wat hen? Nou weej nog niks, zo gemien bint ze, die boekenverkopers. Nou moej het boek wel openslaon um d'r achter te kommen. (Lichtkaans komt d'r nou al koffievlekken op of drupt er jam van de boterham en kan het boek niet weerum, ze doet het d'r um).

Wat veur letters staot er in het boek? Mooie dudelijke veerkaante drukletters? Deurlezen! Van die wriemelletters waor aj kopzeert van kriegt? Drekt stoppen! Ie kunt blind worden van een boek, het zal niet de eerste keer wezen dat ien het locht oet beide ogen mut missen wegens letters die as mieghommels over de bladzieden kroept. Ik ken een loodgieter die een maol een boek lezen hef met wriemelletters en an de bedelstaf raokte wegens blindheid, en gien verzekering die je betaolt, het is op eigen risico.

Nou tellen. Hoe vaok stiet het woord 'ik' op de eerste bladziede? Vaoker as zeuvenentwintig? Gooi maor vort, het is een miskoop. Tiepies zu'n boek wat as ien schref die het allent over zukzulf hebben wil. Vermoedelijk een westerling.

Giet het boek over seks? Hej niks an, kuj zulf beter.

Staot er Engelse naomen op de eerste bladziede, zoas Rodney? Of Henry? Of George? Of Lord McConnely? Of Catharine Willow? Of Betty Coolridge? Of Mister Harriswood? Of John Parkinson? Doctor Conkrite? Jammer, geld verspild!

Is het boek in het Drents? Vort maor!